இந்து மதமும் அதன் சகல அம்சங்களும்-பாகம்-35

இந்து மதமும் அதன் சகல அம்சங்களும்-பாகம்-35
(சுவாமி விவேகானந்தர்)
-
ஐரோப்பா மற்றும் ஆசிய நாடுகளிலுள்ள எல்லா மதங்களுமே துவைத மதங்கள் தாம். அப்படித்தான் இருக்கவும் முடியும். நுட்பமானவற்றைச் சாதாரண மனிதனால் சிந்திக்க முடியாது. தன் அறிவுக்கு எட்டியவற்றைப் பிடித்துக் கொள்ளத்தான் அவன் விரும்புகிறான்.
-
அதாவது உயர்ந்த ஆன்மீக லட்சியங்களையும் தன்னுடைய நிலைக்குக் கொண்டு வருவதன் மூலம்தான் அவனால் புரிந்துகொள்ள முடியும். உலகம் முழுவதுமுள்ள சாதாரண மக்களின் மதம் இது தான்.
-
தங்களிலிருந்து முற்றிலும் வேறுபட்ட, தங்களை அடக்கியாளும் வல்லமை படைத்த சக்கரவர்த்தி போன்ற ஒரு கடவுளே அவர்களுக்கு வேண்டும்.
-
அவரைப் பூமியிலுள்ள சக்கரவர்த்திகளை எல்லாம்விடத் தூயவர் ஆக்குகிறார்கள். எல்லா நற்பண்புகளையும் உடையவராக அவரைக் காண்கிறார்கள், தீய பண்புகளை அவரிடமிருந்து விலக்குகிறார்கள்.
-
ஆனால் நன்மையும் தீமையும் தனித்தனியாக இருப்பது சாத்தியமல்ல என்பதை அவர்கள் மறந்துவிடுகிறார்கள்.
-
(நன்மை இருக்கும் இடத்தில் தீமையும் இருக்கும். நல்லகடவுள் என்று ஒருவர் இருக்க முடியாது.அவரிடம் நன்மை தீமை இரண்டும் இருக்கும். உலகில் நடக்கும் நன்மைக்கு அவர் காரணமானால், தீமைக்கும் அவர்தான் காரணமாக இருக்க முடியும்)
-
துவைதக் கருத்துக்கள் எல்லாவற்றிலுமே ஒரு பெரிய குறை இருக்கிறது. நற்குணக் களஞ்சியமாகவும், நீதியும் கருணையும் நிறைந்திருப்பவராகவும் இருக்கும் கடவுளின் ஆட்சிக்கு உட்பட்ட இந்த உலகில், இவ்வளவு தீமைகள் இருப்பது ஏன்?
-
எல்லா துவைத நெறிகளிலும் இந்தக் கேள்வி எழுந்தது. ஆனால் இந்தக் கேள்விக்குப் பதில் சொல்வதற்காக இந்துக்கள் எந்தச் சாத்தானையும் உருவாக்கவில்லை.
-
(தீமை செய்வது சாத்தானின் வேலை என்றால், அந்த சாத்தானை வெல்ல முடியாத,சாத்தானை கட்டுப்படுத்த முடியாதவரா இறைவன்? என்ற கேள்வி எழுகிறது).
ஆனால் வேதாந்திகள் இதை வேறு மாதிரி சிந்தித்தார்கள்.
--

தொடரும்...
-
-- விவேகானந்தர் விஜயம் --