குமரிமுனைக்கு வாருங்கள்!

குமரிமுனைக்கு வாருங்கள்!
கூர்ந்து கடலைப் பாருங்கள்!
அமர்ந்த நிலையில் பாறையிலே
அவரை நினைத்துப் பாருங்கள்!
வீரமுழக்கம் கேட்கிறதா?
விவேகானந்தர் தெரிகிறதா?
ஈர நெஞ்சம் விரிகிறதா?
இவர் குரல் மனதில் பதிகிறதா?
-
இந்திய மண்ணின் துகள், துகளும்
வந்தனைக் குரிய புனிதமடா!
எந்த மண்ணில் இருந்தாலும்
சொந்த மண்ணை மறவாதே!
ஏழையின் பசியை ஆற்றுங்கள்-அவர்
விழியின் கண்ணீர் மாற்றுங்கள்
வாழுந் தெய்வ வழிபாடு-இது
வழி வழி மதங்கள் கோட்பாடு
விழிமின், எழுமின் சிங்கங்காள்!
வெற்றி பெறும் வரை வீறுடனே
உழைமின்! உயர்மின் உறுதியுடன்!
உலகம் உங்கள் காலடியில்!
-
ஆர்.பி.சாரதி