ஸ்ரீமத்பகவத்கீதை-வாழ்க்கைக்கான பாடங்கள் 54

வகுப்பு-54  நாள்-11-3-2020

-

ஸ்ரீமத்பகவத்கீதை-வாழ்க்கைக்கான பாடங்கள்

-

ஸ்ரீகிருஷ்ணர் கூறுகிறார்

-

ஊர்த்வமூலமத:ஷாகமஷ்வத்தம் ப்ராஹுரவ்யயம்।

சந்தாம்ஸி யஸ்ய பர்ணாநி யஸ்தம் வேத ஸ வேதவித்॥ 15.1 ॥

 

15.1 மேலே வேருள்ளதும் கீழே கிளைகள் உள்ளதும் ஆகிய ஆலமரத்தை அழிவற்றது என்று சொல்கிறார்கள். வேதங்கள் அதனுடைய இலைகள். அதை யார் அறிகிறானோ அவன் வேதத்தை அறிபவன் ஆகிறான்

-

ஆலமரத்தின் வேர்கள் பூமிக்குள் இருக்கும்.கிளைகள்,இலைகள்,பழங்கள் மேலே இருக்கின்றன.

ஆனால் மனிதனைப்பொறுத்தவரை எது வேர்? தலைதான் வேர்

எது பழம்? ஆண்,பெண் பிறப்புறுப்புகள்

 

பிரபஞ்சத்தை ஒட்டுமொத்தமாக எடுத்துக்கொண்டால்

தூலம்,சூட்சுமம்,காரணம் என்று மூன்று படிகள் இருக்கின்றன.

தூலம் என்பது கண்களால் காணக்கூடிய காட்சிகள்

சூட்சுமம் என்பது மரணத்திற்குபிறகு காணக்கூடிய காட்சிகள்

காரணம் என்பது பிரஞ்சம் தோன்றுவதற்கு காரணமாக இருப்பவை

-

தலைகீழாக வளர்ந்துள்ள மேலே வேர்களையும். இடையில் மரத்தின் கிளைகளையும்,முடிவில் இலைகளையும் கொண்ட ஒரு மிகப்பெரிய மரத்தை கற்பனை செய்து பார்க்க வேண்டும்.

இந்த பிரபஞ்சம் தோன்றுவதற்கு காரணமான உலகம் மேலே இருக்கிறது.

சூட்சுமம் உலகம் இடையில் இருக்கிறது.

தூல உலகம் கீழே இருக்கிறது.

-

அந்த மிகப்பெரிய மரத்தின் இலைகள்தான் வேதங்கள்.

வேதம் என்றால் அறிவு

கண்களால் காணும் இந்த உலகத்தில் உள்ள எல்லாமே அந்த மரத்தின் இலைகள்.

இந்த உலகத்தைப்பற்றி அறிந்துகொள்பவன் வேதத்தை அறிந்தவன் ஆகிறான்.

இந்த உலகத்தை அறிவது என்றால் மரம்.செடி,கொடி,விலங்குகள்,மனிதர்கள்,மண்,கல்,கிரகங்கள்,சூரிய,சந்திரர்கள்,உட்பட அனைத்தையும் அறிவது.

-

ந ரூபமஸ்யேஹ ததோபலப்யதே நாந்தோ ந சாதிர்ந ச ஸம்ப்ரதிஷ்டா।

அஷ்வத்தமேநம் ஸுவிரூடமூலம் அஸங்கஷஸ்த்ரேண த்ருடேந சித்த்வா॥ 15.3 ॥

 

15.3 இகத்தில் அந்த மரத்தினுடைய ரூபம் கண்களுக்கு புலப்படுவதில்லை. அதற்கு முடிவில்லை.ஆதியில்லை,இருப்புமில்லை.

இந்த வலுத்து வேரூன்றிய ஆல மரத்தை திடமான பற்றின்மை என்னும் வாளால் வெட்டவேண்டும்.

--

இந்த மரத்திற்கு சம்சாரம் என்று பெயர். இதை வெட்ட வேண்டும்.

பற்றின்மை என்னும் வாளால் வெட்ட வேண்டும்.

எதற்காக வெட்ட வேண்டும்? முக்திக்காக

--

தத: பதம் தத்பரிமார்கிதவ்யம் யஸ்மிந்கதா ந நிவர்தந்தி பூய:।

தமேவ சாத்யம் புருஷம் ப்ரபத்யே।

யத: ப்ரவ்ருத்தி: ப்ரஸ்ருதா புராணீ॥ 15.4 ॥

 

15.4  எங்கு போய் திரும்பவும் திரும்பி வருவதில்லையோ,

யாரிடத்திலிருந்து ஆதியில் பிரபஞ்சம் வெளிப்பட்டதோ

அதே ஆதிபுருஷனை சரணடை.அந்த மேலானநிலை தேடத்தக்கது

 

முக்தி வேண்டுமானால் ஆதிபுருஷனை சரணடையவேண்டும்.

அவரிடமிருந்துதான் ஆதியில் பிரபஞ்சம் வெளிப்பட்டது.

மீண்டும் பிரபஞ்சம் அவருக்குள்தான் ஒடுங்குகிறது.

இந்த உலகத்தை படைத்து.காத்து,அழிக்கும் ஈஸ்வரனிடம் சரணடைய வேண்டும்.

அப்போது சம்சாரம் என்ற இந்த பந்தத்திலிருந்து விடுபட முடியும்.

அந்த ஆதிபுருஷனை சைவர்கள் சிவன் என்பார்கள். வைணவர்கள் விஷ்ணு என்பார்கள்.