விவேகானந்தரின் வாழ்க்கை வரலாறு- பகுதி -43

விவேகானந்தரின் வாழ்க்கை வரலாறு- பகுதி -43
--
மஜூம்தார் என்பவர் சுவாமி விவேகானந்தரின் பால்ய நண்பர். அவர் அமெரிக்காவில் இருந்தபோது அவருடன் சுவாமி விவேகானந்தர் சில காலம் தங்கினார். திடீரென மஜூம்தார் கிறிஸ்தவத்தின் மீது அதிக நாட்டம் காண்பித்தார். ஏசுநாதர் மீதுள்ள காதல் அல்ல அதற்குக் காரணம். கிறிஸ்தவர்களிடையே இந்து மதத்தைப் பற்றி ஏளனம் செய்தால் அதுவும் இந்துவாக இருந்துகொண்டு ஏராளமான பணம் கிடைக்கும் என்பதால்தான்.
இவ்வாறு நடப்பது இக்காலத்தின் நிலைமை மட்டுமல்ல, அன்றும் இதே அவலம் இருந்திருக்கிறது.
அமெரிக்காவில், இந்து மதத்தின் ஏற்றமிகு சிந்தனைகளை சுவாமிஜி மேடை மேடையாக முழங்கிக் கொண்டிருந்தபோது மஜூம்தார் அதற்கு நேர் எதிராகச் சோடை போய்க் கொண்டிருந்தார்.
முடிவில், அவர் சுவாமிஜியைப் பற்றி மிக மோசமான வதந்திகளைப் பரப்ப ஆரம்பித்தார். அவற்றுள் “சுவாமிஜி ஆடம்பர பிரியர்; பெண்களுடன் உல்லாசமாகச் சுற்றுபவர்’ என்பவையெல்லாம் சில.
இதனால் சுவாமிஜியின் சீடர்கள் வருத்தப்பட்டார்கள். முடிவில் அந்த வதந்திகளைப் பரப்புவது யார் என்பதைக் கண்டறிந்தார்கள். உடனே அவர்கள், “”சுவாமிஜி, உங்கள் மீது வதந்திகளைப் பரப்பும் மஜூம்தாருடன் நீங்கள் ஏன் இன்னும் தங்கியிருக்கிறீர்கள்?” என்று கேட்டார்கள்.
சுவாமிஜி அமைதியாக, “”என்னைப் பற்றி மோசமான செய்திகளைக் கூறுகிறார் மஜூம்தார். இந்த நேரத்தில்தான் நான் அவருடன் தங்கியிருக்க வேண்டும். அப்படி இல்லையென்றால், நான் எப்படி சுயகட்டுப்பாட்டினை வளர்த்துக் கொள்ள முடியும்?” என்றார் சிரித்தவாறே.
சுயகட்டுப்பாட்டைக் கற்பதற்காகத் துரோகியின் குடிலில் குடியிருக்கவும் தயங்கவில்லை சுவாமிஜி.
--
சீடர்கள் எந்த நிலையில் இருந்தாலும் அந்த நிலைக்கு இறங்கிஅவர்களை முன்னேற்றுவதுதான் உத்தம குருவின் இயல்பு.
சுவாமி விவேகானந்தர் மேலை நாடுகளில் இருந்த போது, ஒருமுறை கப்பலில் பிரயாணம் செய்து கொண்டிருந்தார். ஒரு நாள் அவர் கப்பலின் மேல் தளத்திற்குச் சென்றார். பரந்த கடல். அதன் மீது ஒளிரும் நிலவொளி. கப்பல் கம்பீரமாகச் சென்று கொண்டிருந்தது.
அந்தச் சிறந்த சூழ்நிலையில் சுவாமிஜி சிந்தனை வயப்பட்டார். கைகட்டி அவர் இயற்கையை ரசிப்பதை அவரது சீடர் ஒருவர் கண்டார். உடனே அவர் சுவாமிஜியிடம் சென்று, “”சுவாமிஜி, இந்தச் சூழ்நிலை மிக அழகாக உள்ளது அல்லவா!” என்று கூறினார்.
படைத்தவனின் பெருமையைப் பற்றிச் சிந்தித்துக் கொண்டிருந்த சுவாமிஜி, தமது சீடரின் மனம் படைப்பின் அழகால் ஈர்க்கப்படுவதைக் கண்டார். சீடரின் மனதை மேம்படுத்தும் வகையில் அவரைத் தீர்க்கமாகப் பார்த்து சுவாமிஜி, “”மகனே, மாயையான இதுவே இவ்வளவு அழகாக இருக்கிறதென்றால் இதன் அப்பாலுள்ள சத்தியம் (கடவுள்) எப்படி இருக்கும் என்பதை நினைத்துப் பார்!” என்றார்.
படைப்பே இவ்வளவு அழகென்றால், படைத்ததவன் எவ்வளவு சிறந்தவனாக இருப்பான் என்பதைச் சீடருக்கு விளக்கினார் குரு.
--
-
தொடரும்...
--
சுவாமி விவேகானந்தரின் வாட்ஸ்அப்குழுவில் இணைய-9003767303 அட்மின்-சுவாமி வித்யானந்தர்