அவதாரப்புருஷர் வரும்போது எப்படி அடையாளம் கண்டுகொள்வது?

அவதாரப்புருஷர் வரும்போது எப்படி அடையாளம் கண்டுகொள்வது?

-

வேதாந்தத்தை பொறுத்தவரை என்றென்றும் நிலையான ஒரே இறைவனைத்தான் அது ஏற்றுக்கொள்கிறது.அவரே தன்னை உயிர்களாகவும் உலகமாகவும் வெளிப்படுத்துகிறார்.அவரை ஈஸ்வரன் என்கிறது.

-

உலக நன்மைக்காக,தேவைகளை நிறைவேற்றுவதற்காக,அந்த காலத்திற்கு ஏற்ற விசேஷ ஆற்றலுடன் ஈஸ்வரன் தோன்றுகிறார்.அவர் தான் செய்ய வேண்டி வேலையை செய்து முடிப்பதற்கான முழுஅதிகாரமும்,ஆற்றலும் பெற்றவராக இருப்பார்.

-

ஈஸ்வரன் மனிதனாக பிறந்தால் அவர் அவதாரபுருஷர்.மனிதனாக பிறந்த ஒருவன் ஈஸ்வரனுடன் ஒன்று கலந்தால் அவர் ஈஸ்வரகோடி.உலகின் தேவைகளைப்பொறுத்து இவர்களது அவதாரம் நிகழும்.சில பணிகளை ஈஸ்வரகோடிகளால் செய்து முடிக்க முடியும்.சிலரின் பணி ஒரு நாட்டுடன் முடிந்துவிடும்,சிலரின் பணி உலகம் முழுவதும் நன்மை செய்வதாக அமையும்.

-

உயிர்கள் அறியாமை மோகத்தில் ஆழ்ந்திருப்பதைக்கண்டு.சொந்த முயற்சியால் தன்னை விடுவித்துக்கொள்ள முடியாததைக்கண்டு இறைவன் அவர்களை உயிவிப்பதற்காக கருணையுடன் வருகிறார்.அவதாரபுருஷரே மனித குலத்தின் உண்மையான குரு.அவர் ஏற்கனவே பிரம்மஞானம் பெற்றவராக இருபப்தால் மற்றவர்களை மாயையிலிருந்து விடுவிக்க முடியும்.

-

அவதாரபுருஷர்களின் சிறுவயதிலிருந்தே ஆன்மீக சாதனைகளில் ஈடுபட்டிருப்பார்கள்.சாதனைகளின் மூன்று நிலைகளான 1.பசுநிலை(தனிமையில் தவம்புரிதல்),2.வீரநிலை(ஆண்-பெண் சேர்ந்து தவம்புரிதல்),3.திவ்யநிலை (பிரம்மஞானத்திற்கு பிறகு வரும்நிலை)இவைகளை வேகமாக கடந்து எங்கும் தன்னைக்காணக்கூடிய திவ்யநிலையை உரிய காலத்தில் அடைந்துவிடுவார்கள்.மற்றவர்கள் வீரநிலையை தாண்டுவற்குள் பிறவி முடிந்துவிடும்.

-

பிரேமபக்தி என்று சொல்லப்படும் பேரானந்தத்தை அவதாரபுருஷர்களால்தான் சுவைக்க முடியும்.மற்றவர்கள் அந்த நிலையை அடையும்போது அதன் ஆனந்தத்தை தாங்கிக்கொள்ள முடியாமல் உடலைவிட்டுவிடுவார்கள்.

-

அவதாரபுருஷர்களின் உடலில் எல்லையற்ற சக்தியை தாங்கும் தன்மை இருக்கும்.அவர்களது மனம் பிரபஞ்ச மனத்துடன் இணைந்திருக்கும்.எனவே அவரிடம் வருபவர்களைப்பற்றிய முழுவிபரமும் உடனே தெரிந்துவிடும்.உலகத்தை தன் விருப்பப்படி மாற்றி அமைக்க அவதாரபுருஷர்களால்தான் முடியும்.

-

தனக்கு முன்பு வந்த மகான்கள் என்ன செய்துள்ளார்கள் என்பதைப்பற்றியெல்லாம் அவதாரபருஷருக்கு தெரியும்.பிரபஞ்சத்தில் ஏற்கனவே உயர்உலகத்தில் வாழ்ந்துகொண்டிருக்கும் தேவர்கள் முதல் அனைவரும் அவதாரபுருஷருக்கு உதவி செய்வார்கள்.ஆணவத்தால் உதவிசெய்ய மறுப்பவர்கள் கீழ்நிலைக்கு இறக்கப்படுவார்கள்

-

அவதாரபுருஷர் வரும்போது இவரால் தங்களுக்கு ஆபத்து என்பதை எதிரிகள் உள்ளுணர்வால் அறிந்துகொள்வார்கள்.அவர்கள் தங்களைஅறியாமலே ஒன்றுகூடுவார்கள். அவரை அழிப்பதற்காக தன்னால் ஆன எல்லா முயற்சிகளையும் செய்து முடிவில் அழிந்துபோவார்கள்

-

சாதாரண பாமரன் முதல் பெரிய மகான்வரை உள்ள அனைவரும் அவரால் ஈர்க்கப்படுவார்கள்.ஒவ்வொருவரும் இவர் தனக்குரியவர் என்று நினைப்பார்.

-

தீயவர்களும் அவரால் ஈர்க்கப்படுவார்கள்.ஆனால் சூரியனைக்கண்ட புழு மறைவிலிருந்து தானாக வெளிவந்து சூரியனின் சூடுதாங்காமல் இறந்துபோவது போல,தீயவர்களின் குணம் காரணமாக அவர்களாகவே வீணாக எதிர்த்து அழிந்துபோவார்கள்.

-

சிறிதளவு ஆன்மீக சக்தி வந்தாலோ,பெரும் புகழ் வந்தாலோ சாதார மனிதர்களால் தாங்கிக்கொள்ள முடியாது.ஆனால் உலகமே புகழ்ந்தாலும் அவதாரபுருர்கள் திலைதடுமாறுவதில்லை.ஆணவம் ஏற்படுவதில்லை.

-

சமாதிநிலையில் பேரானந்தத்தை எப்படியாவது ஒருமுறை சுவைத்துவிட்டால்,சாதாரண மனிதன் இவ்வுலகிற்கு மீண்டும் வரமாட்டான்.ஆனால் அவதாரபுருஷர்கள் இந்த ஆனந்தத்தை எப்போதும் சுவைத்துக்கொண்டிருப்பார்கள் இந்த ஆனந்தத்தை சுவைக்கும்போதே,அதை மற்றவர்களுக்கும் எப்படி கொடுப்பது என்று சிந்திப்பார்கள்

-

முக்தியை அடைய விரும்புபவர்கள்,உண்மையான நேர்மையானவர்கள், தன்னை அறியாமலேயே இவரை சந்திப்பார்கள்.ஏதோ ஒரு சக்தி அவர்களை இவர்களிடம் இழுத்துக்கொண்டுவரும்.அதன் காரணமாக மிகவேகமாக ஆன்மீகத்தில் முன்னேறுவார்கள்.

-

சாதாரண மனிதனைப் பொறுத்தவரை பிரம்மஞானம் பெற்ற பிறகு அவனது கடமைகள் அனைத்தும் முடிந்துவிடும்.அதன்பிறகு உடல்நிலைக்காது.அவதாரபுருஷர்களை பொறுத்தவரை பிரம்மஞானம் பெற்ற பிறகுதான் அவர்களது பணி துவங்கும்.அதன்பிறகுதான் தான் எதற்காக இந்த பூமிக்கு வந்தோம் என்பது அவர்களுக்கு புரியும்

-

சாதாரண சாதகர்கள் இந்த உலகத்தைவிட்டு எப்போது செல்லலாம் என நினைப்பார்கள்.உடலை தடையாக நினைப்பார்கள்.ஆனால் அவதாரபுருஷர்களிடம் உடல் பற்று காணப்படும்.இந்த உடலை எப்படி மக்கள் பணியில் ஈடுபடுத்தலாம் என்று அவர்கள் யோசிப்பார்கள்.தேவையான உணவு கொடுத்து அதை பேணிபாதுகாப்பார்கள்.

-

அவதாரபுருஷர் உலக அன்னையான மகாமாயையில் துணையாலேயே அனைத்து பணிகளையும் செய்வார்

-

உலகத்தை சமநிலைப்படுத்தும் தங்களின் பணி நிறைவுற்றபிறகு உடே சமாதியில் புகுந்து ஈஸ்வரநிலைக்கு சென்றுவிடுவார்கள்.

-

கட்டுரை...சுவாமி வித்யானந்தர்(11-7-2018)

-