சம்பூகன் கீழ் சாதியைச் சார்ந்தவன் அவன் தவம் இருந்ததற்காக ராமன் அவனது தலையை கொய்ததாகக் கதைவுள்ளது

கேள்வி..ஐயா சம்பூகன் கீழ் சாதியைச் சார்ந்தவன், அவன் தவம் இருந்ததற்காக ராமன் அவனது தலையை கொய்ததாகக் கதைவுள்ளது, இது தர்மத்திற்கு முரணாக உள்ளதே ஐயா?
-
தவம் புரிபவர்களில் நல்லவர்கள் கெட்டவர்கள் என்று இரு பிரிவினர் உள்ளனர். கடின தவத்தின் மூலம் பல வரங்களை பெற்று மக்களை துன்புறுத்துபவர்கள் அசுரர்களாகிறார்கள்.
-
அரசர்கள் மட்டுமே தவம்புரிந்து பல அஸ்திரங்களை பெற்று நாட்டை காப்பாற்றுவார்கள் என்பதால்,மற்றவர்கள் தவம்புரிவது அந்த காலத்தில் தடைசெய்யப்பட்டிருக்கலாம்.

-
இதை தற்போதைய நிலையில் பார்ப்போம். இந்தியாவிடம் அணுஆயுதம் உள்ளது,பாகிஸ்தானிடமும் அணுஆயுதம் உள்ளது. நாம் அணுஆயுதத்தை மற்றவர்கள் மேல் வீணாக உபயோகப்படுத்தமாட்டோம் என்பது உலகிற்கே தெரியும். ஆனால் பாகிஸ்தான்? யாரிடம் சக்தி இருக்க வேண்டுமோ அவர்களிடம் சக்தி இருந்தால்தான் அது உலகிற்கு பாதுகாப்பாக இருக்கும்.பாகிஸ்தான்,வடகொரியா போன்ற நாடுகளிடம் அணுஆயுதம் இருப்பது உலகிற்கே ஆபத்து ஆகவே அதை தடுக்க வேண்டும் என்று மக்கள் இன்று நினைக்கிறார்கள்.
-
பழைய காலத்தில் தவம் மூலமாகத்தான் சக்தி வந்தது. இந்த காலத்து அணுஆயுதம் போன்றதே பழைய காலத்து தவம். தவத்தின் மூலம் பல அற்புத அஸ்திரங்களை பெறுவார்கள். புராணங்களை படித்தால் இன்னும் தெளிவாக புரிந்துகொள்ளலாம்.ஒரு சாதாரண மனிதன் கடின தவம்புரிந்து அசுரனாகி, மக்களையும் மற்றவர்களையும் துன்புறுத்தும் கதை ஏராளம் உள்ளது.
-
அந்த காலத்து அஸ்திரங்கள் இன்றைய அணுகுண்டுபோல் பலரின் உயிரை குடித்துவிடும். ஆகவே சுயநலத்திற்காக தவம் செய்ய நினைப்பவர்களை முதலிலேயே அழித்துவிடுவது நல்லது என்று நினைத்து ராமன் சம்பூகன் என்பவனை கொன்றிருக்கலாம்(இது என் கருத்து). அவ்வாறு கொல்லாமல் விட்டால் சம்பூகன் ஒரு அசுரனாக மாறியிருக்லாம்.
-
பழைய காலத்து நிகழ்வுகளை புரிந்துகொள்ள வேண்டுமானால் பழைய காலத்தின் சூழ்நிலைக்கு செல்ல வேண்டும். இந்த காலத்தில் நின்று கொண்டு அவற்றை எடைபோட முடியாது. தற்காலத்தில் ஒருவர் வாழும் வாழ்க்கையும் முற்காலத்தில் ஒருவர் வாழும் வாழ்க்கையும் ஒரேபோலவா இருக்கிறது?
-
ராமனின் ஆட்சியில் மக்கள் அனைவரும் தங்க தட்டில் உணவு உண்டார்கள். ஏழைகளே இல்லை என்று படிக்கிறோம். இப்போது அப்படியா உள்ளது? ராமனின் ஆட்சியில் சூத்திரர்கள்கூட தங்க தட்டில்தான் உணவு உண்டிருக்கிறர்கள். அவர்களில் யாரும் ஏழைகளாக இருக்கவில்லை.
-
ஒரு வண்ணான்(சூத்திரன்) சொல்லை பெரிதென கருதி, அவனை தண்டிக்காமல், தன்உயிருக்கு உயிரான சீதையை காட்டிற்கு அனுப்பிய ராமன் , சூத்திரர்களிடம் எப்படி கொடூரமாக நடப்பான்? கொடூரமாக ஒருபோதும் நடந்ததில்லை.
-
மீனவ குலத்தை சேர்ந்த குகன் யார்? அவனை தன் தம்பிகளில் ஒருவராக ஏற்றுக்கொள்ளவில்லையா? ஆகவே சம்பூகன் ஒரு சூத்திரன் என்ற காரணத்தினால் ராமன் அவரை கொன்றிருக்கமாட்டார். சம்பூகனின் தவம் அன்றைய நடைமுறைக்கு எதிராக இருந்ததால் தான் அது நடந்துள்ளது.
-
‘ராமனை பழித்து பேசுவதன் மூலம் ராமனின் புகழை யாரும் அழித்துவிட முடியாது
--
சுவாமி வித்யானந்தர்
-
இந்துமதம் வாட்ஸ் அப்.9789 374 109